標題:107學年度校內語文競賽閩南語朗讀文章--頭一擺的音樂會 |
|
|
03頭一擺的音樂會
王雪瑜
今仔日是我頭一擺佇中興堂的大舞台頂表演,這是我一年來的向望。為著欲上台,我穿一軀白色的短衫短褲,面頂有藍色佮紅色的花草,看著誠影目。透早就來排練到今,雖然是佮逐家同齊演出,毋過,看著台跤密喌喌的人,我嘛是緊張甲雙跤咇咇掣,雙手一直流手液,按怎拭都拭袂焦。老師一直交代阮表演的時陣愛有笑容,毋過,逐家攏緊張甲笑袂出來。布幕一下搝懸,指揮老師的手一下比,我就綴節奏開始輕輕敲木琴。拄開始節奏慢慢仔,敢若鴨仔咧行路。聽著後壁的大鼓愈挵愈大聲、愈挵愈緊,袂輸火車對遠遠的所在欲衝過來,我手中的木琴槌仔嘛綴咧愈敲愈緊,一時仔敲正爿、一時仔敲倒爿。身軀綴音樂搖來搖去,煞尾鼓聲一下停,指揮老師的手隨攑懸,表演結束。噗仔聲響起,我規个人隨快活起來,這時陣我歡喜甲笑出來。想著會當佮表姊仝款上台表演實在誠無簡單。
舊年拄歇熱的時陣,表姐足歡喜共我講伊八月佮音樂教室欲佇中興堂表演,問阮規家伙仔欲去聽伊的音樂會無?阿母聽了隨應好。猶會記得音樂會彼工,表姐穿一領柑仔色的Ha-uá-ih草裙,頷頸掛一捾花箍,手提一台飛行機,綴指揮老師行入舞台,表演的歌曲是「來去Ha-uá-ih」。台頂的伊面帶笑容,身軀綴音樂的節奏搖來搖去。沙鈴、鈴鼓佮邦哥鼓快速的節奏,敢若熱情的舞步,一直徙位,一直扭尻川花。紲落來木琴的聲音加入來,敢若粟鳥仔咧啄米,遮一下、遐一下。雖然節奏無拄才遐緊,毋過,予人有一種聽著心花開的感覺。就是這種感覺,予我決定欲綴表姐的跤步,來去學木琴,想欲佮伊仝款徛佇舞台頂表演予逐家看。
為著今仔日的表演,我連紲兩個月,逐工都練習兩點鐘。落尾這四擺上課攏愛排練,予我心情一直足緊張的。落台了後,老師問阮明年欲閣來開音樂會無?愛風神的我,真有氣魄共老師頕頭。
|
|
|
發佈者:本站 來源:
鄭冠仁 日期:2018-12-11 16:13:49
|