標題:107學年度校內語文競賽-閩南語演講-食緊_破碗 |
|
|
食緊挵破碗
演說時間:4.5分~5分
各位評判老師,各位同學逐家好,我是○號,今仔日我欲演說的題目是「食緊挵破碗」。
「噹!噹!噹」已經摃鐘矣!十二點一到,足濟同學就親像是野馬,鼻著芳貢貢的味,手提碗兇兇狂狂,準備欲傱去第一个來添飯,誰知阮這班阿志傷趕狂,煞共規桶湯捙捙倒矣,當然後果是去予老師罵,彼工規班嘛無湯通啉。這陣老師隨共阮講:食緊挵破碗,做代誌毋通凊凊彩彩傷趕狂,才袂愈欲趕緊,顛倒害。
無毋著,咱臺灣有一句俗語話講:「食緊挵破碗」,有時陣,咱愈著急欲做好一項代誌,傷過生狂,無好好仔計畫,顛倒會舞甲真悽慘。
自小漢阿爸教我行跳棋,伊共我講:「愛先想好後一步才行啦」我定定是這爿入,彼爿出,做代誌衝衝碰碰的我,又閣無耐心,拄開始行跳棋,袂曉布局,只要看著頭前有空就衝,到落尾攏輸甲塗塗塗,阿爸就講:人生親像是棋子,行跳棋愛學會曉攻佮守,閣愛學會曉布局,過程愛顧前顧後,毋但愛知影布家己的局,嘛愛布對手的局,有時陣,一步錯,百步歪。就按呢我沓沓仔知影:一步棋,一步著,逐步攏愛想予好勢才出手,才袂「哎!」吐大氣,事後來後悔。
電視當咧播一首歌,歌詞是茶埔囡仔唱:你迷人古錐的模樣,敢會當做阮女朋友;查某囡仔唱:咱二人拄才熟似,對你無了解,你著慢慢仔來;最後一句是講:愛情佮事業,攏愛照步行,一點一滴用心肝,無,食緊你著挵破碗。確實人生若行棋,咱就像棋子仝款,無論是佗一款角色,攏愛隨時想予清楚。
閣有一擺,我咧研究蝶仔,有一工,我看著蝶仔的卵,就提轉去厝裡,然後過一段時間,看著內底的蝴蝶開始想欲控出來。我看著這个過程真久,真艱苦,伊按怎控嘛無法度飛出來。這个時陣的我看著不忍心,就想:不如予我共伊鬥相共,隨攑鉸刀剪開,予蝶仔會當飛出來。毋過哪知這隻蝶仔是出來了,毋過翼股是無力,煞飛袂起來,只有佇塗跤爬,後來阿母共我講:因為伊猶未經過家己奮鬥的過程,就是緊紡無好紗,食緊挵破碗。是啊!人生本底就是一場長冗冗的旅行,無論你是毋是想欲趕緊大漢,咱猶是愛勻勻仔累積,才會當有好未來。
今仔日我的演說到遮結束,感謝各位!
|
|
|
發佈者:本站 來源:
鄭冠仁 日期:2018-12-13 14:58:37
|