合:歡歡喜喜上學去(華語發音),快快樂樂心花開。
合:GO!GO!GO!O LE O LE O LE !GO!GO!GO!O LE O LE O LE!
合:逐家好!
黑輪:我是黑輪
歐蕾:我是歐蕾
黑輪:今日是快樂的好日子,爸爸呀!媽媽呀!我會挈「金牌」
送予恁。(以“快樂出帆”的曲調唱)
歐蕾:tsioh4 toh4 mah4 teh4!牛聲馬喉乞食調,予我聽徦強欲擋袂
稠。「金牌」哪會是這種的氣口?
黑輪:好!來!跤馬徙予在,包你聽徦笑咳咳。
青是什麼青啊!台灣「金牌」啤露尚青。(那講那共金牌啤露挈
出來)
歐蕾:唬!這種的「金牌」有敗害,毋是咱囡仔人的「最愛」(華語發
音),毋通接觸才應該。
黑輪:喔!NO!我無講你毋知,這款的「金牌」銷路全世界,煞予你
當做若鳥鼠仔屎,真正是悲哀(用少寡哭調的聲,拖“哀”
的音)。
歐蕾:煞!你莫閣黑白「唉」,換你跤馬徙予在,耳空開予利,
目睭照過來,正港的「金牌」就是這一塊。(華語發音,共真正
的金牌展出來)
黑輪:哈!哈!哈!你這扮的配金牌,真正是「圓仔花毋知bai2」!
講!金牌佗位來?撿的、借的、抑是...偷摸來的
歐蕾:你這隻喙有夠bai2,共我看徦遮毋值。這是我走飊比賽得著的
金牌。
黑輪:同學(台灣國語發音)真gau5 真 gau5,出國比賽,挈金牌轉
來拜。
歐蕾:到旦你才知!毋擱,挈金牌毋免出國嘛會使。
黑輪:不應該!啊!不應該!有這款好空的,毋就較早報我知。
歐蕾:是你家己哮呆哮呆,無感覺今仔日全校是鬧熱tshainn2
tshainn2?
黑輪:借問咧,金牌佮鬧熱tshainn2 tshainn2有啥底代?
歐蕾:今仔日是咱學校創校四十冬的生日,校慶擱兼運動會。
這塊金牌是我比賽的「心血」。
黑輪:這種大日子,逐家攏歡喜!只是毋知你「黑矸仔貯豆油」,
腳底攏抹火油,走若飛,煞予你挈著頭香。
歐蕾:歹勢!歹勢!你莫閣共我剾洗,這馬咱就緊來去鬥鬧熱。
看斟酌!司令台頂紅花青葉滿滿是,人客貴賓坐徦滇滇滇。
喙笑目笑真歡喜,噗仔聲準共催落去。
黑輪:我知,我知,in是為著健康,毋才一直扑噗仔練拍手功(華語
發音)。
歐蕾:我看你是頭殼悾悾!台仔跤的齣頭真濟閣趣味,噗仔聲才會響
袂離。
黑輪:有影吶!運動埕有六年的當咧跳大會舞。
音樂熱情閣輕鬆,忸咧忸咧身軀齊振動,害我看徦目睭險脫窗。
歐蕾:紲落來,低年級的跳健康操。
逐家擔頭向前行,精神飽滇啥物攏無驚,喝徦大細聲,
跳徦流凊汗,正港是飄撇的囡仔兄。
黑輪:in有影飄撇閣古錐,予我雄雄想著迄當時(假影三魂七魄飛出
去的款)。
歐蕾:你毋通見想都過去,做人要面對現實,後壁猶有好戲,
認真看落去。
黑輪:阿娘喂!迄陣唯司令台頭前行過的妖魔鬼怪是啥物?
畫黑漆白點胭脂,三分毋成人, 七分毋成鬼。
歐蕾:你的「目睭皮無漿泔」,彼叫做創意進場(華語發音),
激頭腦展智慧,看佗一班尚卡哇伊。
黑輪:原來如「貓」,看予真,毋若媠閣嬈,有影gau5變khiau3,
猶閣有若濟齣頭?
歐蕾:好酒沉甕底,包你High袂退。
趣味競賽花樣濟,好耍閣笑詼。
黑輪:耍徦倒凹坐,滿面全豆花,真正笑詼。
歐蕾:別人的痛苦是你的快樂,你予人袂呵咾。
走飊比賽聽槍聲,向前衝比輸贏。
黑輪:「矮、肥、短」嘛落去鬥鬧熱,「唉」!落氣步盡展。
歐蕾:「三骹貓笑一目狗」,你敢有較gau5?
迄爿沙坑比跳遠,躼(lo3)跤的占較有份。
黑輪:呰爿準備搝大索,123、123喝無歇,氣力盡展強欲軟趖趖。
歐蕾:尚高潮是接力賽,gau5走的盡派出來,仙拚仙,看佗一班是正
港的猴齊天,精彩閣刺激,你若看無著,心肝是會礙虐!
黑輪:足濟人佇邊仔加油喝hiu,真正是「老人食麻油」,鬧熱滾滾有
意思。
歐蕾:校慶的節目毋若遮,展覽的物件是規牛車,欲看要緊去展示廳,
包你看了會講:「等我娶某生囝,阮囝嘛欲予讀遮」。
黑輪:你莫閣佇遐「竹篙鬥菜刀」,哩哩囉囉。
歐蕾:校慶呰一日,算咱尚歡喜。
黑輪:節目誠精彩,逐家攏真High
合:比輸比贏無關係,運動健康顧身體。
唱GO!GO!GO!O LE O LE O LE !GO!GO!GO!O LE O LE O LE!下台
|