甲：比賽就卜開始啊，汝擱咧食什麼？(著急的表情)較緊ㄟ啦。

乙：好啦！好啦！我來啊啦！

甲：安呢咱就卡緊來開始。(二人假影清喉嚨)

甲：真健康！

乙：真大箍！

甲＆乙：上台行禮。（向評判委員、觀眾行禮）

甲：ㄟ！汝tha7 拄啊是咧食什麼？

乙：汝真正是「目睭皮無漿泔」，這是「頂港有名聲，下港有出名」，今嘛電視廣告內底上時行的小善存維他命C啊！

甲：維他命C？柑仔、柳丁、西瓜、柑仔蜜，茲个果籽凊彩食二喙，就有足濟維他命C，若就佫無彩錢。

乙：阮阿母講「有燒香有保庇，有食補就有行氣」，茲維他命C加食寡，有病治病，無病補身體。（挈出維他命C，就卜吞落去。）

甲：ㄟ！（共維他命C搶過來。）擱食！擱食！汝呣通無病食徦有病。

乙：呸呸呸！汝迄支「烏鴉喙，胡累累」，無代誌勿愛   佇遐咒讖我患病。

甲：做人勿愛   鐵齒，卜食藥仔嘛愛聽先生的指示，呣通無病亂投醫。

乙：啊你哪會「未啉假醉，未講就大心氣」，「一句話，三斤六重」。

甲：人講「食著藥，青草一葉；食呣著藥，人蔘一石」。

乙：聽汝講徦哩哩嘞嘞、喙角全波，我是「鴨子聽雷聽攏無」；呰句話倒底是什麼意思？

甲：症頭若是無相仝，藥仔食落會無對銅，開錢無效（是）無彩工，若扑痞身體就悽慘。

乙：汝勿愛 佇遐共阮嚇驚！

甲：汝看汝，一個面是白拋拋、幼咪咪(乙表現出真歡喜的表情)，生著古錐啊古錐、肥軟(nui2)啊肥軟(nui2)….

乙：kau3旦汝則知。(真臭屁的表情)

甲：看汝一表人才，明明是「泰山的體格」，若知影汝--根本就是「阿婆的身體」。

乙：有這麼嚴重嘛？（阿扁總統的台灣國語腔調）

甲：逐遍上體育課，汝若走二步仔就軟葛葛，跁一下啊樓梯就喘phenn7 phenn7，勿會輸是肥滋滋的「肉雞」--「大箍好看頭」。

乙：汝呣免佇遐「龜笑鼈無尾，鼈笑龜粗皮」！咱二个是一个半斤，一个八兩！差呣多啦（客家語）！

甲：差呣多（客家語）？ 汝呰隻規工食好料的「肉雞」，佮我呰隻耐操佫有擋頭的「土雞」比起來，是「一丈差九尺」。

乙：著著著！我是白拋拋、幼咪咪，若有像汝安呢規个面烏嚕嚕，若像ㄟ三工無洗身軀。

甲：我是皮膚烏，手骨粗，人佫無蓋大箍。身體勇健無病痛，醫生館透世人呣捌行，體力是好徦若啥，運動埕走十輦嘛呣驚。

乙：汝呣通佇茲咧「蟾蜍展氣功—膨風」。

甲：像汝規工食肯德基、麥當勞，青菜果籽食無夠，體力當然嘛無擋頭，走二步啊就擋勿會椆。

乙：嘿嘿嘿！（歹勢歹勢的感覺）

甲：看汝三工二頭就感冒流鼻水，不時就發燒頭痛身體虛，身體荏徦卜死，食飯佫愛配雞腿，真正是「散田敖吮水」。

乙：汝嘛勿愛   共我漏氣！

甲：「甘藷好食免大條」，三頓正常上重要，食魚食肉猶無夠，青菜果籽嘛愛食來搭（鬥）。

乙：汝是講：「食魚食肉嘛愛食菜敆」。

甲：著啦！著啦！俗語講：「飯後行百步，較好行藥鋪；食飯減一口，活徦九十九」。

乙：汝是講：減食寡、加淡薄仔運動，就呣免食徦一堆藥仔是否？

甲：著啦！人講：「食補不如食苦」，只要咱加減啊運動，身體自然就健康，呣免共家己當做藥櫥仔，開錢擱無彩工。

甲＆乙：嗯！猶是「天然的上好」。

甲：真健康！

乙：真大箍！

甲＆乙：落台行禮。（向評判委員、觀眾行禮）