標題:107學年度校內語文競賽-閩南語演講-難忘的一節課 |
|
|
難忘的一節課〈演說稿〉
演說時間:4.5分~5分
做人處事袂潦草,囡仔大細人呵咾。各位評判老師,各位同學逐家好,我是 號,今仔日我欲演說的題目是「難忘的一節課」
「噹!噹!噹」已經摃鐘啊!一上課,足濟同學就親像是野馬,兇兇狂狂衝入教室,班長喊一聲:「上課啊!」逐家一聽著就緊坐好勢等老師來,講著這節課,我學會曉足濟句俗語話,親像是「食緊挵破碗」;「細漢偷挽匏,大漢偷牽牛」;「飲水思源頭,食果子拜樹頭」,講到遮,各位一定臆會著我上難忘的一節課是啥物課!無錯,規欉好好,就是閩南語課啦。
臺灣話,會當講是咱祖先生活的過程佮智慧,聽了後真正會予人心涼脾土開。這工上課的時陣,老師講:予恁逐家臆一个謎猜,題目是『紅關公,白劉備,黑張飛,走去覕』臆一種果子!」恁想有無?逐家是想甲一粒頭兩粒大想攏無,佮老師半滾笑講:老師公佈答案啦,原來就是─荔枝,因為紅關公就是皮,白劉備就是肉,黑張飛就是伊的籽,合起來就是荔枝。老師一講煞,逐家是笑甲喙仔裂獅獅,險險仔就落下頦。
不而過,你敢有想過:為啥物我會愛上這節課咧?閣有一个原因,就是因為我真愛聽一寡趣味的囡仔歌,親像這首「天烏烏,欲落雨,阿公啊攑鋤頭欲掘芋!」按怎!袂歹聽哦!狗聲乞食喉的我毋驚見笑,嘛足愛和逐家輪流展歌喉,攏唱甲足歡喜的,熱鬧滾滾,好耍閣心適。
捌有一擺老師講一句:「阿志,你過來共老師「鬥跤手」…」同學阿志聽了後,掠無頭摠,隨應老師講:「我….我毋是醫生,欲按怎共你鬥跤佮手咧?」一講煞,老師笑笑啊講:「臺語的鬥跤手─是共人鬥相共,華語叫做 幫忙。」聽著老師的解說,規班的同學逐家是笑甲東倒西歪!這陣我才感覺,上閩南語課看起來是真簡單,無啥物了不起,毋過老師講:母語文化,親像是無底深坑,若無好好的保存湠落去,有可能會漸漸佇阮這代的手中消失去!
上閩南語課,予我知影真濟母語的媠,難忘的一節課予我捌足濟知識,上台講煞無煩惱,感謝眾人共我褒!我的演說到遮結束,感謝各位!
|
|
|
發佈者:本站 來源:
鄭冠仁 日期:2018-12-13 14:59:19
|