04快樂的兒童節                   

吳秀卿

今仔日是學校一年一擺的兒童節慶祝活動。踏入校門就看著司令台布置甲媠噹噹，五花十色的雞胿仔，敢若一座美麗的城堡。運動埕頂頭一排一排的風吹輪綴風一直轉、一直踅，若咧跳舞、若咧唱歌歡迎阮遮的小公主、小王子。

八點鐘仔聲霆，校長就敲鑼宣佈活動開始。一大陣的學生囡仔親像放出籠的鳥仔，衝對運動埕去。頭前排是灌風的跙流籠、電動機車站、雪文波王國、投籃勇士隊、野球九宮格，有夠鬧熱！閣較內底猶有電影院、小丑仔樂園。哇！學校變做一个遊樂園呢！雄雄看著美國隊長、蜘蛛人佇入口迎接阮，原來逐關的關主攏是老師妝的。

我先去騎電動oo-tóo-bái，體驗騎車的威風，才閣去小丑仔樂園。小丑仔阿叔有夠古錐，伊做足濟好耍的動作共逐家弄甲笑咍咍，閣予阮捏伊的紅鼻仔，捏一下就吱一聲、捏兩下就吱兩聲，害阮笑甲攬腹肚。紲落來，閣去上蓋受歡迎的電動投籃球機台，排隊的人躼躼長。誠無簡單輪著我，我就功夫盡展，連紲投三粒入去，趁三塊糖仔。

用野球掔九宮格閣較愛靠技術，我球提咧相準準大力掔出去，輕輕鬆鬆就共九个格仔攏掔倒，現場噗仔聲霆袂煞，予我足有成就感的！上尾，走去看電影佮雪文泡王國耍，會使講逐項攏耍透透，耍甲足歡喜的，我感覺阮正港是今仔日上奢颺的主角。

十一點一下到，逐家攏準時集合，因為上刺激的節目就欲起鼓矣！彼就是班級灌風的跙流籠比賽。聽著觱仔聲，規班衝對跙流籠遐去。逐家團隊合作，下面的人共頂面的人鬥捒，一个接一个拚命起去頂懸。等規班攏到位才同齊跙落來，雖然逐家攏甲大粒汗細粒汗，毋過，笑容是遐爾甜、遐爾仔滿足。這場比賽嘛是今仔日上精彩的『Ending』。

這擺的兒童節活動，袂輸一場刺激的冒險，嘛親像眠夢仝款。感謝所有的老師佮志工，替阮設計遮爾心適的活動，予阮會當歡歡喜喜過一个快樂的兒童節