02愛綴路的

王秀容

「啥人欲綴喔？」阿公準備欲出門囉。伊刁工喝欲予我聽的，因為兄姊攏大漢無欲綴矣，毋過我閣足愛綴呢！定定佇門口耍甲一半，影著阿公欲出去，就隨喝講：「我欲佮阮阿公來去矣，後擺才耍。」囡仔伴攏嘛隨應講：「愛綴路的。」

有通食、有通耍，我毋才會想欲綴。佇「生食都無夠，哪有通曝乾」的囡仔時代，若會當啖著四秀仔，袂輸猴山仔食著弓蕉咧，樂暢的感覺，到今想著猶閣會偷笑。

是食啥物好料的咧？上豐沛的就是去食一碗五箍銀的摵仔麵。彼塊囥佇中央的肉杮仔，攏留甲規碗囫了，才用湯匙仔共撈入去喙裡含咧，毋甘隨哺哺吞吞落去。阿公撏錢咧納數的時，我綴佇伊尻川後，全心全意咧欶彼塊肉的汁，足甜的呢！莫怪到這馬，去到佗都愛食摵仔麵，連去飯店食包肥的『buffet』，嘛會先來一碗。人攏笑我無彩錢，黜我講「哪閣有法度通食別項咧？」毋捌啦！摵仔麵食落去，心情好，脾土開，顛倒食較濟！

我嘛誠愛綴阿公去漢藥店。定定有人來厝裡揣阿公討藥單，隔轉工伊就會去敆藥仔。遐會當看著足特別的物件，像龜啦、鱉啦、海馬啦，閣藥頭仔逐款攏有名，我坐佇邊仔一下仔看動物，一下仔看植物，一下仔認藥格仔頂的字，袂輸咧踅博物館咧，足趣味的。頭家驚我等久會囉，逐擺阮尻川才頓好，伊隨捎兩包宋陳予我窒喙空。酸微仔酸微，我會共含佇喙裡閣用舌共輾來輾去，袂輸擉煙腸的珠仔台，足好耍呢！若講傷久，頭家閣會補我兩包，我攏儉轉去分兄姊食。

我上愛綴阿公坐市區的去辦代誌，因為車牌仔遐拄好有一間